શાસ્ત્રીપોળને યાદ કરીને ભાવુક થયેલા મોદીએ કહ્યું: 'બાળકને મા સાચવે એમ વડોદરાએ મને સાચવ્યો, એ હું ક્યારેય નહીં ભૂલું'

વડાપ્રધાન નરેન્દ્ર મોદી પાવાગઢથી નીકળીને વડોદરા પહોંચ્યા હતા. જ્યાં વડાપ્રધાન મોદીનું એરપોર્ટ પર સ્વાગત કરવામાં આવ્યું હતું. ત્યાર બાદ તેઓ વડોદરા એરપોર્ટથી લેપ્રસી મેદાન પહોંચ્યા હતા, જ્યાં તેમણે ખુલ્લી જીપમાં બેસીને જનતાનું અભિવાદન ઝીલ્યું હતું. આ પહેલાં મોદીએ ગાડીમાં બેઠાં બેઠાં રસ્તામાં ઊભેલા લોકોનું પણ અભિવાદન ઝીલ્યું હતું. મોદીનો કાફલો એરપોર્ટ પરથી નીકળ્યા બાદ વરસાદ શરૂ થઇ ગયો હતો. તેમણે પોતાના હિન્દીમાં ભાષણ દરમિયાન વચ્ચે વચ્ચે ગુજરાતીમાં પણ બોલ્યા હતા. મોદીએ પોતાના ભાષણમાં વડોદરાની શાસ્ત્રી પોળને ફરી એકવાર યાદ કરી હતી. દિવ્ય ભાસ્કરે બે દિવસ પહેલા જ મોદી અને શાસ્ત્રી પોળ વચ્ચેના સંસ્મરણોને યાદ કર્યા હતા.

PM મોદીનું સંબોધન

આજનો દિવસ મારા માટે માતૃ વંદનાનો દિવસ છે, આજે સવારે જન્મદાત્રી માના આશીર્વાદ લીધા, ત્યાર બાદ જગતજનની મા કાલીના આશીર્વાદ લીધા અને આજે માતૃશક્તિનાં વિરાટ દર્શન કરી તેમના આશીર્વાદ લીધા

મેં માતાજી પાસે દેશવાસીઓની સુખશાંતિ અને સમૃદ્ધિની કામના કરી છે. મને ખુશી છે કે સંસ્કારનગરી વડોદરાથી 21 હજાર કરોડના ડેવલપમેન્ટ પ્રોજેક્ટનાં લોકાર્પણ અને ખાતમુહૂર્ત થયાં છે.

21મી સદીના વિકાસ માટે મહિલાઓનો વિકાસ અને સશક્તીકરણ ખૂબ જ જરૂરી છે. અમારી સરકારે મહિલાઓ માટે પસંદગીનું કામ કરવા માટે દ્વાર ખોલી દીધા છે.

હુ ખુશનસીબ છું કે મને માતા અને બહેનોની સેવા કરવાનો મોકો મળ્યો છે, હું તમામને અભિનંદન આપું છું.

વડોદરા સંસ્કારની નગરી છે, આ શહેર તમામ લોકોને તક આપે છે, આ શહેરે ક્યારેક મને પણ સાચવ્યો હતો. મારું પણ લાલનપાલન કર્યું હતું

વડોદરા આવો એટલે બધું જૂનું આવે જ ભાઈ, વડોદરાએ મને બાળકને મા સાચવે એ રીતે સાચવ્યો છે, વડોદરાનું મારા જીવનમાં યોગદાન ક્યારેય ન ભૂલી શકું

શાસ્ત્રીપોળ, રાવપુરા સહિતનાં સ્થળોને ક્યારેય નહીં ભૂલી શકું, ડભોઇ, પાદરા જેવી ગણ્યા ગણાય નહીં એટલી યાદો છે

વડોદરા આવે અને લીલો ચેવડો અને ભાખરવડી કેમ ભુલાય

2014માં લોકસભા ચૂંટણી લડ્યો ત્યારે વડોદરાના નવનાથ અને કાશી વિશ્વનાથ મંદિરમાં મને આશીર્વાદ મળ્યા

800 કરોડ રૂપિયાની મુખ્યમંત્રી માતૃશક્તિ યોજના શરૂ કરી છે, એના માટે હું ભૂપેન્દ્રભાઇને અભિનંદન આપું છું

સ્વામી વિવેકાનંદ, મહર્ષિ અરવિંદ, વિનોદ ભાવે, બાબા સાહેબ આંબેડકરને પણ આ નગરીએ પ્રેરિત કર્યું છે

સપ્ટેમ્બર માસને પોષણ માસ તરીકે ઊજવવાનું નક્કી કર્યું છે, જેથી માતાઓને પોષણ મળી રહેશે

હમણાં જ ભૂપેન્દ્રભાઇએ મને કહ્યું હતું કે ઘરે ઘરે નળથી પાણી આપીએ છીએ, માતાઓનાં માથે બેડાં ઉતારવાનું સૌભાગ્ય અમને મળ્યું છે

મુદ્રા લોન લેનારાઓમાં 70 ટકા મારી બહેનો છે, આ ડબલ એન્જિનની સરકારનો લાભ છે, જેમાં ચારેય તરફ વિકાસ થઇ રહ્યો છે

દોઢ લાખ લોકોને પાકું મકાન મળ્યું છે, આ મકાન મળે તે બહેનોના નામે હોય, એવો મારો પ્રયાસ હોય છે

રેલવે કનેક્ટિવિટી માટે 16 હજાર કરોડ રૂપિયા આજે વડોદરાને મળ્યા છે

તમારા વડોદરામાં તો લીલા લહેર છે, મહેમાન આવે તો પાવાગઢમાં મા કાલી પાસે લઇ જવાના, કેવડિયા લઇ જવાના, દુનિયાવાળાને ખબર પડે અમે કેટલા આગળ નીકળી ગયા છીએ. આ વડોદરાવાળાને તો પાંચેય આંગળીઓ ઘીમાં છે બાપા

ગુજરાતમાં બે નવાં ગ્રીન એરપોર્ટની તૈયારી ચાલી રહી છે. વડોદરાને સ્માર્ટ બનાવવા માટે 25 પ્રોજેક્ટ મંજૂર થયા છે, જેમાંથી 16 પ્રોજેક્ટ પૂર્ણ થઇ ગયા છે

આ દેશની પહેલી રેલવે યુનિવર્સિટી, એ પણ વડોદરામાં અને ગતિ યુનિવર્સિટી તરીકે એનો વિસ્તાર પણ વડોદરામાં થઇ રહ્યો છે

મોદીએ ખુલ્લી જીપમાં બેસી 1.25 કિમી ફરી અભિવાદન ઝીલ્યું

અભેધ સુરક્ષા કવચ વચ્ચે વડાપ્રધાન નરેન્દ્ર મોદી આજે લેપ્રસી મેદાનમાં પાંચ જિલ્લામાંથી આવનારા લોકોને સંબોધન કર્યું હતું. વડાપ્રધાન આ સભામાં 21 હજાર કરોડથી વધુના પ્રોજેક્ટનાં લોકાર્પણ-ખાતમુર્હૂત કર્યા હતા. એ પૂર્વે ડોમમાં જ ખુલ્લી જીપમાં બેસીને લોકોનું અભિવાદન ઝીલ્યું હતું.

5 જિલ્લાના લોકો સભા સ્થળે પહોંચ્યા

વડોદરા  રોડ પર લેપ્રસી ગ્રાઉન્ડ ખાતે વડાપ્રધાન મોદીની આજે આયોજિત જનસભામાં હાજરી આપવા વડોદરા શહેર-જિલ્લા સહિત આસપાસના છોટાઉદેપુર પંચમહાલ દાહોદ જિલ્લા સહિતના લોકો મોટી સંખ્યામાં ઊમટી પડ્યા છે.

લોકોએ ગરબાની રમઝટ બોલાવી

વડોદરા શહેરના લેપ્રસી ગ્રાઉન્ડ ખાતે વડાપ્રધાનના કાર્યક્રમમાં મોટી સંખ્યામાં લોકો પહોંચ્યા હતા, જ્યાં યુનિવર્સિટીના વિદ્યાર્થીઓ નૃત્ય સાથે રાસ-ગરબાનું રિહર્સલ કરી રહ્યા હતા. તેમની સાથે સમગ્ર સભા સ્થળ રાસ-ગરબા સાથે હર્ષોલ્લાસભર્યા વાતાવરણમાં ફેરવાઈ ગયું હતું અને લોકોએ ગરબાની રમઝટ બોલાવી આનંદ માણવાની સાથે વડાપ્રધાનને આવકાર્યા હતા. આમ, તહેવાર પ્રિય સાંસ્કૃતિકનગરી વડોદરામાં ગરબાનો ભારે ક્રેઝ રહેતો હોય છે, ત્યારે સમયનો લાભ ઉઠાવી લોકોએ ગરબાની રમઝટ બોલાવી હતી