હાર્દિકના ભાજપ પ્રવેશમાં ગરબડ ના થાય તે માટે કમલમ પાસે પોલીસ બંદોબસ્ત, ભાજપના કાર્યકરોને ચૂપ રહેવા આદેશ

કોંગ્રેસ છોડી હાર્દિક પટેલના ભાજપ પ્રવેશ સમયે કોઈ ગરબડ ના થાય તે માટે ભાજપ પ્રદેશ કાર્યાલય કમલમની આસપાસ પોલીસનો લોખંડી પહેરો ગોઠવવામાં આવી શકે છે એટલું જ નહીં હાર્દિક ના ભાજપ પ્રવેશ અંગે સોશિયલ મીડિયામાં કોઈ પણ ટીકા ટિપ્પણી કે કોઈ પણ વિવાદ ઉભો ના કરવા માટે ભાજપની તમામ ટીમોને સૂચના પહોંચાડવામાં આવી હોવાનું જાણવા મળે છે.

કમલમમાં પહેરો મજબુત બનાવી દેવામાં આવ્યો

પાટીદાર અનામત આંદોલનથી નેતા બનીને કૉંગ્રેસનો પણ હાથ છોડી ભાજપમાં જોડાઈ રહેલા હાર્દિક પટેલ સામે પાટીદાર સમાજના કેટલાક યુવાનોમાં ભારે રોષ ફેલાયો હોવાના મુદ્દે IB એ પણ સરકાર સુધી જાણ કરી હોવાથી કમલમમાં પહેરો મજબુત બનાવી દેવામાં આવ્યો છે. ખાસ કરીને કેટલાક વિરોધી કોઈ બબાલ ના કરે તેની સાવચેતી રાખવામાં આવી છે.

વિરોધ ના થાય તે માટે ભાજપ પણ એલર્ટ

પાટીદાર અનામત આંદોલન દરમિયાન ભાજપ સરકાર અને નેતાઓની વિરુદ્ધમાં બેફામ નિવેદન કર્યા બાદ હાર્દિક પટેલ ભાજપનો જ ખેસ પહેરી રહ્યા હોવાથી પાટીદાર સમાજમાં ક્યાંક ને ક્યાંક રોષ ફેલાયો છે. સોશિયલ મીડિયાના માધ્યમથી હાર્દિકની સામે એક જૂથ જબરદસ્ત વિરોધનું વાતાવરણ ઊભું કરી રહ્યું છે, તેથી ભાજપ પણ એલર્ટ થઈ ગયો છે. આ ઉપરાંત હાર્દિકના ભાજપ પ્રવેશના મામલે સોશિયલ મીડિયામાં પણ કોઈ પણ પ્રકારની પોસ્ટ કે ટીકા ટિપ્પણી નહીં કરવાની સૂચના પણ ભાજપ દ્વારા આપવામાં આવી હોવાનું જાણવા મળ્યું છે.

12 વાગ્યે હાર્દિક પટેલ ભાજપમાં જોડાશે

હાર્દિક પટેલ કોંગ્રેસના કાર્યકારી પ્રમુખ પદેથી રાજીનામું આપીને હવે ભાજપનો કેસરીયો ખેસ પહેરશે. આજે કમલમ ખાતે 12 વાગે હાર્દિક પટેલને બહારના ગાર્ડનમાં બાંધેલા સમીયાણામાં ભાજપમાં એન્ટ્રી મળશે. હાર્દિક પટેલ તેમના નિવાસ સ્થાને દુર્ગાપાઠ પૂજન કરશે. ત્યાર બાદ એસપીજી ગુરૂકુળ ખાતે રામ, શ્યામ અને ઘનશ્યામના દર્શન કરીને સાધુ સંતોની હાજરીમાં ગૌ પૂજા કરશે. ત્યાર બાદ કમલમ જવા રવાના થશે.

આજે ભાજપના બે અલગ-અલગ પ્રોગ્રામ

કમલમ ખાતે યોજાનાર કાર્યક્રમમાં હાર્દિક પટેલની જીદ પકડી હોવાની વિગતો સામે આવી રહી છે, હાર્દિક ભાજપમાં જોડાવાનો છે તે નક્કી થઈ ગયા બાદ એ કઈ રીતે ભાજપમાં જોડાશે તેની આખી રૂપરેખા હાર્દિકે જ નક્કી કરી છે, એક દિવસ અગાઉ હાર્દિક પટેલ ગાંધીનગર ભાજપ કાર્યાલય ખાતે કેટલાક નેતાઓને મળ્યા હતા, જ્યાં તેણે પોતાની જોડાવવાની વાત અને એકલા જ જોડાવાની જીદ કરી હતી, ત્યારબાદ ભાજપે બે અલગ-અલગ પ્રોગ્રામ કરવાનું હવે નક્કી કર્યું છે.