મહિલા વર્લ્ડકપમાં બાંગ્લાદેશને 110 રને હરાવ્યું, સેમિફાઈનલમાં પહોંચવાની આશા જીવંત

ICC મહિલા વર્લ્ડકપમાં ભારત અને બાંગ્લાદેશ વચ્ચે 22મી લીગ મેચ હેમિલ્ટનના સેડન પાર્ક સ્ટેડિયમમાં રમાઈ હતી. આ મેચ ભારતે જીતી લીધી છે. મિતાલી રાજની કેપ્ટન્સીમાં ટીમ ઈન્ડિયાએ બાંગ્લાદેશને 110 રનથી હરાવ્યું. મહિલા વર્લ્ડ કપ 2022માં ભારતીય ટીમની આ ત્રીજી જીત છે. આ જીત સાથે ટીમ પોઈન્ટ ટેબલમાં ત્રીજા સ્થાને પહોંચી ગઈ છે

ટીમ ઈન્ડિયાની બાંગ્લાદેશ વિરુદ્ધ આ સતત 5મી જીત છે. આ જીતની સાથે જ ભારત મહિલા વર્લ્ડકપની પોઈન્ટ્સ ટેબલમાં 6 પોઈન્ટ સાથે ત્રીજા સ્થાને પહોંચી ગયું છે. ભારતને એકમાત્ર બાકી રહેલી મેચ 27 માર્ચે સાઉથ આફ્રિકી વિરુદ્ધ રમવાની છે. ભારતીય ટીમે સેમીફાઈનલમાં પહોંચવા માટેનો દાવો મજબૂત કરી લીધો છે.

આ મેચમાં ટીમ ઈન્ડિયાએ બાંગ્લાદેશ સામે 230 રનનો ટાર્ગેટ રાખ્યો હતો, જેના જવાબમાં બાંગ્લાદેશની ઈનિંગ્સ 40.3 ઓવરમાં 119 રન બનાવીને સમેટાઈ ગઈ હતી અને 110 રનથી મેચ હારી ગઈ હતી. આ સાથે ટૂર્નામેન્ટની સેમિફાઇનલની રેસમાં બાંગ્લાદેશની સફરનો અંત આવ્યો. જો કે બાંગ્લાદેશની ટીમ હજુ બે મેચ રમશે, પરંતુ હવે ટીમ માટે સેમીફાઈનલમાં પહોંચવું લગભગ અશક્ય છે.