મેઘરાજાની પધરામણીભરૂચ જિલ્લામાં મેઘરાજાનું ધમાકેદાર આગમન, 5 તાલુકાઓમાં આજે વરસાદ વરસ્યો

રાજ્યમાં ચોમાસાનું આગમન થઈ ગયું છે. ત્યારે ભરૂચ જિલ્લામાં પણ આજે મેઘરાજાની ધમાકેદાર શરૂઆત થઈ છે. જિલ્લામાં છેલ્લા બે દિવસથી પવન જોવા મળ્યો હતો અને ધૂળની ડમરીઓ જોવા મળતી હતી. જેથી લોકો વરસાદની ચાતક નજરે રાહ જોઈ રહ્યા હતા અને ગરમીમાંથી રાહત મળે તેમ ઈચ્છી રહ્યા હતા. આ વચ્ચે આજે સવારે વરસાદે ધમાકેદાર એન્ટ્રી કરી હતી. જિલ્લાના 9 પૈકી પાંચ તાલુકાઓમાં વરસાદ વરસ્યો છે. જેથી વાતાવરણમાં ઠંડક પ્રસરી છે.

મેઘરાજાએ તોફાની બેટિંગ શરૂ કરી

ભરૂચ જિલ્લાના વાતાવરણમાં આજે પલટો જોવા મળ્યો હતો. સવારે અમી છાંટણા બાદ થોડા થોડા સમયના અંતરે વરસાદ વરસતા વાતાવરણને આહલાદક બનાવ્યું હતું. જે બાદ સવારે 11 કલાકે મેઘરાજાએ તોફાની બેટિંગ શરૂ કરી હતી. ઉનાળા દરમિયાન 42 ડિગ્રીને પાર કરી ગયેલો તાપમાનનો પારો ગગડતા લોકોએ ગરમીમાંથી રાહત અનુભવી હતી. હવામાન વિભાગ દ્વારા વરસાદની આગાહી કરવામાં આવી હતી. તે વચ્ચે વરસાદ વરસ્યો હતો.

કાળા ડિબાંગ વાદળો વચ્ચે વરસાદ

અંકલેશ્વર પંથકમાં સવારે કેટલાક વિસ્તારમાં કાળા ડિબાંગ વાદળો જોવા મળ્યા હતા. જોકે, માત્ર અમી છાંટણા કરી વરસાદ પલાયન થઈ ગયો હતો. ગુજરાતમાં ચોમાસાનું આગમન થઈ ગયું છે. અનેક જિલ્લામાં છેલ્લા કેટલાય દિવસથી વરસાદી માહોલ તેમજ વરસાદ વરસી રહ્યો છે. ત્યારે ભરૂચ જિલ્લામાં પણ વરસાદનું આગમન થઈ ગયું છે. જેથી લોકોને ગરમીમાંથી હાલ રાહત મળી છે..